Xaneiro na horta: seguimento das sementeiras e traballos de inverno 🌾
Co comezo do ano novo, continuamos observando con atención a evolución das nosas sementeiras. O inverno non sempre xoga ao noso favor, pero tamén nos deixa momentos para a reflexión e melloras na organización da horta.
🌿 Evolución das plantacións: luces e sombras
Algunhas especies están a progresar ben malia as condicións frías e a escasa luz solar:
- No horto 1, tirabeques e chícharos seguen o seu curso e xa dan sinais de estaren case para recoller os primeiros, con sinais de crecemento constante e boa saúde.
- No horto 2, as nabizas non destacan pola abundancia, pero manteñen un desenvolvemento firme e equilibrado.
- No bancal 3, as leitugas mantéñense estables. O frío frea o seu crecemento, pero aguantan ben e sen síntomas de enfermidades.
- No bancal 2, definitivamente o kale non xerminou e teremos que voltar a probar para o ano.
🧤 Mantemento e coidado no corazón do inverno
A pesar das temperaturas baixas, o traballo na horta non para. Este mes dedicamos esforzos a manter as condicións óptimas para o solo e as plantas:
- Eliminamos herbas competidoras nas zonas activas, asegurando que os cultivos teñan acceso suficiente a nutrientes e luz.
- Fixemos unha limpeza exhaustiva das marxes e camiños, especialmente importante nestas datas húmidas para evitar problemas de acceso e acumulación de maleza.
- Aplicamos novamente abono verde de estrugas, que preparáramos previamente en maceración con auga de choiva. Tras 15 días de fermentación, diluímos o líquido (1 parte de preparado por 10 de auga) para nutrir o solo de forma natural e ecolóxica.
Este primeiro mes do ano lembrounos que o ritmo da natureza é pausado pero constante. A paciencia e o coidado son as mellores ferramentas para quen traballa a terra. Seguimos aprendendo, sempre co ollo posto na próxima colleita 🌱
